سلام بِنُص العاصفة  

“قَدْ كَلَّمْتُكُمْ بِهَذَا لِيَكُونَ لَكُمْ فِيَّ سَلَامٌ. فِي الْعَالَمِ سَيَكُونُ لَكُمْ ضِيقٌ، وَلَكِنْ ثِقُوا: أَنَا قَدْ غَلَبْتُ الْعَالَمَ.” (يُوحَنَّا ١٦:‏٣٣)

حبايبي المباركين شگد من المرات نحس إنو الحياة دتضغط علينا من كل صفحة؟

هموم، قرارات صعبة، أوقات غير مفهومة، وأخبار تخطف الراحة. مرات بهيج ظروف نتخيل إنو الإيمان المفروض يعفينا من التعب، بس المسيح كان صريح وشفاف ويانا للدرجة اللي تخليه يكشفلنا الحقيقة بدون تجميل “فِي ٱلْعَالَمِ سَيَكُونُ لَكُمْ ضِيقٌ“.

لكن الروعة مو بوجود الضيق… الروعة بالوعد اللي يحيط بهالضيق من البداية للنهاية: “فِيَّ سَلَامٌ“ و “أَنَا قَدْ غَلَبْتُ ٱلْعَالَمَ“.

المسيح حط گدامنا دائرتين نعيش بيهم كل يوم:

• دائرة العالم: بيها تعب، خسارة، ومواقف تكسر الوهس.
• دائرة المسيح: بيها سلام عجيب، ضمان، وغلبة أكيدة.

المسيح ما وعدنا بسفينة ما تضربها الأمواج أبداً، بس وعدنا إنو هاي السفينة مستحيل تغرق وهو موجود بيها. الغلبة اللي نطانا إياها مو معناها إنو العاصفة راح توقف فوراً، بس معناها إنو العاصفة ما راح تگدر تدمرك. أنت منتصر، مو بشطارتك أو قوتك، بل بقوة اللي غلب العالم لأجلك.

إذا چان قلبك اليوم مثقل، أو دا تمر بـ “ضيق” محد يعرف بيه غيرك، اسمع صوته دايرددلك: “ثق… لا تخاف… أنا مريت بكل هذا وغلبته، وراح أغلب بيك وبحياتك اليوم“.

ارمي حملك عليه، واتذكر

 الضيق مؤقت، بس غلبتنا وانتصارنا على الضيق بيه هو وحده أبدي.